O grupo municipal do BNG no Concello de Vigo levará unha moción para o seu debate no próximo pleno, para pedir a condena das “accións genocidas” do Estado de Israel na franxa de Gaza e trasladar o “clamor” da cidadanía viguesa en contra da ofensiva militar israelí. Na súa moción, os nacionalistas pedirán ao Pleno que condende “sen ambaxes” o “xenocidio” que está a perpetrar Israel, e que declare ao seu presidente, Benjamin Netanyahu “persoa non grata”.
Así mesmo, propón instar o Goberno español a facer efectivo o embargo total de armas, acordado no Congreso, e unha ruptura de relacións comerciais e diplomáticas con Israel. Tamén pide apoio para as accións da Corte Penal Internacional por crimes de guerra e de lesa humanidade, e promover accións a nivel europeo e internacional para pór fin á ofensiva e ocupación en Gaza.
Por outra banda, demanda aos gobernos autonómico e municipal “que suspendan toda cooperación con Israel, directa ou indirecta”, e calquera contrato público con empresas ligadas á industria militar israelí. Igualmente, o BNG pide o envío de axuda humanitaria por parte de ambas as administracións e accións de condena a través de Acción Exterior da Xunta.
