O PP reclamou a paralización “inmediata” da torre de control dixital do aeroporto de Vigo, solicitando a AENA que “dialogue” cos profesionais, ante o “precedente errado” en Menorca. En concreto, o grupo parlamentario do PP no Congreso dos Deputados presentou unha proposición non de lei para o seu debate na comisión de Transportes e Mobilidade Sustentable co obxectivo de que se paralice dita torre de control remota que se está implantando en Peinador.

A iniciativa do Partido Popular solicita que se garanta a continuidade do servizo desde a torre física actualmente operativa ante as “dúbidas” que suscita o novo sistema de videoviXilancia entre os controladores aéreos.

Tal e como indicou nun comunicado a deputada viguesa Irene Garrido, a tecnoloxía da nova torre dixital de Peinador conta cun “precedente errado” en Menorca. Alí acabouse desistindo deste sistema, que foi cualificado como un “experimento” polo propio presidente do xestor aeroportuario AENA. Ante esta situación, os deputados do PP instan á empresa a retirar o proxecto e a abrir un proceso de “diálogo estruturado” cos profesionais para “garantir que calquera innovación tecnolóxica en materia de navegación aérea conte co consenso técnico e laboral necesario”.