O alcalde de Vigo, Abel Caballero, puxo en valor as cifras de ocupación de establecementos turísticos e dos voos do aeroporto de Peinador, impulsadas pola campaña do Nadal e proclamou que “dous días do Nadal de Vigo equivalen a todo o Xacobeo”. En declaracións remitidas este mércores aos medios, o rexedor olívico puxo en valor as “cifras marca” de Vigo “en todos os ámbitos de análises”. Así, destacou o nivel de ocupación dos voos, do 82,4 %, no mes de decembro na terminal viguesa, e destacou que, salvo a conexión con Londres, todos os voos funcionan “a mercado”.

Por contra, insistiu, a Xunta “subvenciona moitísimos voos en Santiago con diñeiro de Vigo” e “ocúltao”, facéndoo “a través de Turgalicia”. “Hai unha opacidade total, para que non se saiba que están a subvencionar o aeroporto de Santiago en contra do aeroporto de Vigo”, volveu denunciar. A pesar diso, incidiu Caballero, a cidade olívica abriuse paso como foco de atracción e converteuse no “proxecto turístico emerxente máis importante de toda Europa”. “Isto é o que hai, dous días do Nadal de Vigo equivalen a todo o Xacobeo, ao que a Xunta dedica máis de 200 millóns de euros”, subliñou. Igualmente, remarcou que o Goberno galego “non lle dedica nin un céntimo ao Nadal de Vigo” porque “é o antiVigo do PP (…), sempre á contra da cidade”.