O alcalde de Vigo, Abel Caballero, criticou que o PP e o BNG “nunca” falaron ” ben” da campaña do Nadal da cidade, e, no caso dos ‘populares’, repetiu que “non soportan” que sexa un éxito, “o éxito turístico máis importante de Galicia, moito máis que o Xacobeo, ao que a Xunta dedica centos de millóns”. Así o expresou o rexedor olívico nunhas declaracións remitidas aos medios, e tras as críticas do PP pola forma en que o Concello regulará o acceso ás rúas do centro con tráfico restrinxido durante o Nadal: mediante un cartón exclusivo para residentes empadroados, sen ter en conta a traballadores, usuarios de prazas de garaxe non empadroados, e outros casos.
Segundo explicou Caballero, esta medida tomouse para “dar facilidades aos residentes do centro” e “o PP oponse”. “A protesta é porque o PP e o BNG non soportan que o Nadal sexa un éxito tan importante que toda España está a esperar a que o alcalde de Vigo diga o día en que acende o Nadal”, sinalou. O alcalde incidiu en que nin o PP nin Rueda soportan que Vigo teña “o éxito turístico máis importante de Galicia, moito máis que o Xacobeo, ao que a Xunta dedica centos de millóns”. “Pregúntolle aos cidadáns cantas veces ouviron a Rueda falar ben do Nadal de Vigo, ou a Feijóo ou ao PP ou ao BNG. Nunca, son os únicos en España que falan mal do Nadal, non soportan os éxitos da cidade”, sentenciou.
“NON HAI MÁIS XORDO QUE O QUE NON QUERE OIR”
En resposta ás palabras do rexedor, o portavoz do PP, Miguel Martín, insistiu en que os ‘populares’ non están en contra do Nadal de Vigo, nin de dar facilidades aos residentes do centro, aínda que cuestionan o método dos cartóns de acceso. “Dixémolo moitas veces, pero non hai máis xordo que o que non quere oir, e ese é o problema, que Abel Caballero non escoita a ninguén”, sinalou o edil. Segundo subliñou, se o alcalde “prestase un mínimo de atención” daríase conta de que a campaña do Nadal viguesa ten “moitas cousas que solucionar”, e advertiu de que “enrocarse en que o Nadal de Vigo é perfecto e non ten marxe de mellora é non ver a realidade”.
Miguel Martín lembrou que os propios veciños cuestionaron o sistema dos cartóns de acceso, por levar impresos os datos persoais dos solicitantes e por non solucionar o acceso a traballadores ou a outras persoas que necesitan acceder á zona e non están empadroadas. “Pero para resolver un problema, primeiro hai que admitilo e non acusar aos demais de antivigueses ou antinavideños”, apostilou, antes de incidir en que “ninguén discute o éxito do Nadal, pero estaría ben coidar a quen sofren as súas consecuencias non desexadas, empezando por escoitarlles”.
