O alcalde de Vigo, Abel Caballero, reclamou á Deputación de Pontevedra a firma do convenio de colaboración anual de 5 millóns de euros para financiar distintas obras na cidade, polo que o ente provincial suxeriu que o rexedor “non está informando o seu equipo” xa que levará a cabo “en breve” a rúbrica.
Nun audio difundido aos medios de comunicación, o rexedor olívico lamentou que a cidade “segue esperando a firma” do devandito convenio, explicando que se enviaron os papeis no mes de marzo. “Pasaron oito meses e seguimos sen que a Deputación firme o convenio”, engadiu.
Sempre segundo as palabras de Caballero, a ausencia deste acordo suporía que a Deputación deixaría de participar no financiamento de obras como a humanización das rúas da contorna de Balaídos, a iluminación do monte da Guía ou a cuberta do pavillón de Coia, entre moitas outras.
Respecto diso, a vicepresidenta da Deputación, Luisa Sánchez, criticou que o alcalde “falte á verdade” e obvie “interesadamente” que se acaban de asinar convenios por valor de 6,2 millóns de euros para salvar proxectos “que o Concello non foi capaz de executar en tempo e forma herdados do anterior goberno provincial”.
“Creo que o alcalde ten un problema serio, que non é só o seu ton ameazante. Pode ser que viva illado no seu despacho ou que o seu equipo de goberno non o respecte ou non o informe. Non o sei, pero esta mesma mañá puiden falar cunha persoa do seu equipo de goberno para confirmarlle que enviariamos novos convenios en breve”, engadiu Sánchez.
Ela asegurou que a proposta de convenio si foi enviada hai oito meses, pero para revisala solicitouse máis documentación, “que non chegou ata verán”.
“É tal a falta de rigor, que a piscina de Teis, que en marzo custaba 2,8 millóns euros, hoxe custa 7 millóns”, expuxo a vicepresidenta provincial.
“Vigo non só ten garantidos os 5 millóns do convenio deste ano, senón que ten comprometido a día de hoxe o maior volume de fondos provinciais da súa historia con 30 millóns de euros. Fronte á confrontación estéril e ao ruído do alcalde, esta Deputación e esta vicepresidencia sempre cumpriron a súa palabra”, sentenciou.
