O alcalde de Vigo, Abel Caballero, ameazou este luns con volver levar o financiamento das escolas infantís aos tribunais, e denunciou que a Xunta subvenciona a educación infantil (de 0 a 3 anos) en “moitos outros concellos”, mentres que en Vigo é a administración municipal a que asume o seu custo.
Nunhas declaracións gravadas e remitidas aos medios, o rexedor informou de que o goberno local aprobou a prórroga do contrato de xestión de dúas das escolas infantís municipais, a de Santa Cristina e a de Saiáns, por 538.000 euros. Segundo lembrou, Vigo conta con 9 escolas infantís municipais, cun total de 674 prazas, “totalmente gratuítas”, cunha subvención municipal de 2 millóns e medio de euros anuais, de maneira que non só é gratis a educación infantil, senón tamén a matrícula e o servizo de comedor destes centros.
“Última advertencia á Xunta: a Xunta non custea a gratuidade das escolas infantís municipais de Vigo e si as doutros municipios. Hoxe mesmo enviamos un requirimento a Rueda para que proceda a pagar a gratuidade destas escolas, que son gratis en moitos municipios e en Vigo a paga o Concello”, avisou o alcalde. Se non hai resposta a este requirimento, engadiu, o Concello acudirá ao contencioso-administrativo pola “fraude á cidade de Vigo”, e esixiu que a Xunta “trate a Vigo exactamente igual que a outros municipios”.
“MALA MEMORIA”
As críticas de Abel Caballero tiveron resposta por parte do goberno galego, en boca da delegada territorial da Xunta en Vigo, Ana Ortiz, que lamentou que ao alcalde “fállalle a memoria ou a información da que dispón”. “Ou quizá as dúas cousas, porque non quero pensar que mente a propósito“, apostilou.
Segundo sinalou Ortiz, “é falso” que a Xunta non achegue financiamento ás escolas infantís en Vigo e subvenciona en total unhas 3.400 prazas (entre públicas, privadas e de iniciativa social). No caso das escolas infantís municipais, a Xunta achegou para o pasado curso 524.000 euros. “Agora di que volverá aos xulgados, cando os xulgados xa rexeitaron ata en 4 ocasiones recursos presentados polo Concello (en materia de financiamento das gardarías)”, resolveu a delegada.
