PP, BNG e PSOE apoiaron, de forma conxunta, no Parlamento galego unha iniciativa para prorizar o proxecto da Biblioteca Pública do Estado en Vigo.
Foi tras unha iniciativa presentada polo PP na Comisión de Educación e Cultura e con acordo previo, antes da votación, entre populares e socialistas sobre o texto definitivo, despois de que tanto BNG como PSOE presentasen emendas.
Os nacionalistas comunicaron, no entanto, previamente a súa intención de apoiar a iniciativa popular de non ser aceptada a súa emenda, na que se pedía garantir a continuidade da Biblioteca Pública Juan Compañel, en complementariedade coa futura biblioteca do Estado, cuestión que non se incluíu no texto finalmente aprobado.
Con demanda do Parlamento galego á Xunta para manter o apoio ao proxecto e solicitar ao Ministerio de Cultura información sobre a situación actual, os prazos temporais e a previsión orzamentaria, así como pedir que se axilicen os trámites para a construción do edificio da futura biblioteca, o debate non estivo exento de reproches entre as distintas formacións.
De “atraso clamoroso” cualificou o deputado do PP Julio García Comesaña a xestión do Concello de Vigo, nunha intervención na que pediu ao Executivo central investimento orzamentario. “É un conto interminable que empezou en 2005 e que o PP e PSOE utilizaron como arma arreboladiza“, sentenciou a parlamentaria do BNG Carmela González, quen cualificou de “ridículos e insultantes” que figurasen “50.000 euros para 2023”.
Pola súa banda, a deputada socialista Elena Espinosa reprochou á Xunta pór “obstáculos” ao proxecto cunha “paralización real durante a presidencia de Rajoy entre 2011 e 2018”. Fronte a iso, asegurou que se trata dunha actuación en “vías de solución” co actual Goberno. “O Ministerio comprometeu fondos”, aseverou.
