O alcalde de Vigo, Abel Caballero, pediu un encontro co presidente da Xunta, Alfonso Rueda, para “tratar os temas que o Goberno galego ten pendente coa cidade”. Nun audio difundido aos medios de comunicación, o rexedor informou de que enviou unha carta ao mandatario galego cunha proposta de “man tendida para a cooperación”, co obxectivo de reunirse con el e analizar aspectos relevantes para a urbe olívica.
Para Caballero, é un “bo momento”, tras a reelección de Rueda e no seu quinto mandato como alcalde, para iniciar unha “cooperación de forma franca” entre as dúas partes. O encontro, segundo dixo, poderá realizarse tanto en Santiago como en Vigo, a elección de Rueda, esperando o rexedor a súa resposta.