A Xunta Electoral de Galicia decretou o arquivo dunha denuncia formulada polo PPdeG en relación a declaracións realizadas polo ministro de Industria, Jordi Hereu, durante a súa visita aos concellos de Redondela e Vigo, e que foron publicitadas na web corporativa e redes sociais.
O órgano determina que a información denunciada se refire ás axudas do Perte VEC (Vehículo eléctrico e conectado) destinadas ao sector da automoción, e á visita en Galicia do ministro para “animar ás empresas a participar nas diferentes liñas de financiamento como parte da actividade ou estratexia propia do ministerio”.
En relación ao contido de redes sociais e a publicacións de prensa achegadas polos populares, conclúe que “se limita a informar os motivos da visita do ministro”.
Por iso, “ponderando as declaracións e a información” facilitada neste caso, a Xunta Electoral non aprecia que exista vulneración da lei electoral por “non considerarse electoralistas os feitos e informacións publicadas e denunciadas”.
