O alcalde de Vigo e presidente da agrupación socialista local, Abel Caballero, trasladou este luns os seus “parabéns” ao PP e a Alfonso Rueda pola súa vitoria nas eleccións autonómicas deste domingo, e fíxoo a través dunha concisa mensaxe na rede social X (antes Twitter).
O rexedor, que levou o peso da campaña electoral na cidade olívica, publicou un ‘post’ coa imaxe da bandeira e o escudo de Galicia, no que felicita a Rueda “pola súa vitoria electoral, contundente e inapelable”. “A miña felicitación democrática e o meu desexo do mellor para Galicia”, reza a mensaxe de Abel Caballero.
O líder socialista vigués, no entanto, non fixo mención algunha aos resultados do seu partido en Galicia nin na cidade que el dirixe, onde o PSdeG perdeu máis de 12.500 votos, quedándose con 30.781 papeletas, e con case 12 puntos de apoio menos con respecto ás anteriores eleccións galegas.
Así o PSdeG pasou nestes comicios a ser terceira forza política na urbe olívica, por detrás de BNG (que se converteu en primeira, crecendo un 13,7% e con máis de 25.000 votos adicionais, ata os 56.820) e do PP (que tamén subiu case 10.000 votos, ata os 54.010).
Todo iso nun contexto no que o propio Abel Caballero asumiu o peso e o protagonismo da campaña electoral en Vigo, onde os carteis electorais do PSdeG lucían, no mesmo plano, a imaxe do alcalde e a do candidato, José Ramón Gómez Besteiro.
XABIER P. IGREXAS CARGA CONTRA CABALLERO
O portavoz municipal do BNG en Vigo, Xabier Pérez Igrexas, puxo en valor este luns o resultado “histórico” obtido pola formación nacionalista na cidade nos comicios galegos deste domingo e referiuse a a petición realizada en campaña polo alcalde, o socialista Abel Caballero, á líder do BNG, Ana Pontón, a quen reclamou que o desautorizase como portavoz municipal: “Está claro a quen desautorizaron os vigueses nas urnas”.
Así o trasladou o edil nacionalista nunhas declaracións remitidas aos medios, nas que recalcou o “salto de xigante” dado polo BNG tras obter máis de 56.800 votos este domingo, situándose como primeira forza nas eleccións autonómicas, por diante de PP e PSOE. Para Xabier Pérez Igrexas, ese resultado supón “un non rotundo” da cidade ás políticas de “malos tratos e abandono” da Xunta, e Alfonso Rueda “debe tomar boa nota”.
Pero ademais, engadiu o portavoz nacionalista, os vigueses expresaron que “non queren máis do mesmo”. Nese sentido, subliñou que o BNG “case duplicou” o apoio obtido polo “candidato ‘fake'” do PSOE, o alcalde Abel Caballero, protagonista en Vigo da campaña electoral dos socialistas.
