A que foi ministra de Agricultura e de Medio Ambiente e concelleira de Vigo, Elena Espinosa, e o secretario local do PSOE na cidade olívica, Carlos López Font, encabezan a proposta do PSOE provincial de Pontevedra para a candidatura coa que o partido se presentará ás eleccións autonómicas do próximo 18 de febreiro.
Na lista abordada este luns polo PSOE provincial figuran como número tres, catro, e cinco a pontevedresa Palomaa Castro, o arousán Julio Torrado e a viguesa Leticia Gallego. O tres socialistas foron deputados na lexislatura recentemente finalizada.
Deste xeito, queda fóra o nome do exsecretario xeral do PSdeG Gonzalo Caballero, quen foi proposto na asemblea do PSOE de Vigo para encabezar a lista pola provincia. Precisamente, sobre a ausencia do político vigués, fontes socialistas sinalaron a Europa Press que hai un acordo entre os distintos niveis do partido para que finalmente non encabece a lista e quede fora Gonzalo Caballero. O pacto incluiría que nun futuro o político vigués ocupe outras responsabilidades no partido.
Ademais, estas fontes tamén puxeron en valor o feito de que finalmente se optase por unha muller para encabezar a lista pola provincia, unha socialista que foi durante sete anos ministra de Agricultura baixo a presidencia de José Luís Rodríguez Zapatero.
O sexto posto ocúpao o alcalde de Silleda, Manuel Cuíña, e a continuación figuran a viguesa Ana Costas, e o concelleiro de Ponteareas, Delfín Domínguez.
