O goberno municipal de Vigo prevé a aprobación provisional do novo Plan Xeral de Ordenación Municipal (PXOM) o próximo 28 de decembro, data na que, se non hai sorpresas, convocarase a sesión plenaria para ese efecto, na que a maioría absoluta dos socialistas permitirá dar luz verde ao documento urbanístico.
Previamente, o documento será levado, este xoves, ao Consello da Xerencia de Urbanismo, que actúa como comisión informativa neste caso. Deste xeito, o novo Plan terá o visto e prace do Concello antes da data límite do 5 de xaneiro, momento en que decae a vixencia do Instrumento de Ordenación Provisional (IOP).
Así, está previsto que no primeiro semestre do ano que vén entre en vigor a novo PXOM, que substituirá ao Plan aprobado en 2008 e anulado en 2015 polo Tribunal Supremo, debido a unha insuficiente motivación por parte da Xunta (naquel momento gobernada por PSOE e BNG) acerca da non obrigatoriedade da avaliación ambiental estratéxica.
O 28 de decembro, por tanto, cúmprese un novo fito na tramitación do novo plan, tras anos de xestións, estudos, modificacións, adaptacións, recollida de informes, etc. O PXOM foi aprobado inicialmente en agosto de 2021 e, no período de presentación de alegacións, presentáronse 4.502 suxestións ou reclamacións.
Segundo explicou o goberno local, das alegacións presentadas, o 45 % foron aceptadas “total ou parcialmente”; así mesmo, o equipo de Abel Caballero defendeu a seguridade xurídica do novo Plan, a creación de chan industrial, as zonas verdes e equipamentos, creación de chan para vivenda protexida ou as novas dotacións.
O Plan Xeral de 2008 foi anulado a finais de 2015 e, tras un intento, rexeitado pola Xunta, de recuperar o documento no que se chamou a ‘solución Parejo’ (en alusión á alternativa proposta polo experto en urbanismo Luciano Parejo), o goberno municipal acabou por iniciar os trámites para redactar un novo documento.
A redacción da novo PXOM foi adxudicada en outubro de 2018, e a aprobación provisional chegou en agosto de 2021. Mentres, nos últimos anos, nos que Vigo se viu obrigada a ‘volver’ ao plan de 1993, os proxectos estratéxicos e de interese público, como o complexo intermodal de Vialia ou a ampliación do Ifevi, puideron tramitarse sen Plan grazas á lei autonómica 3/2016.
Así mesmo, outra das ferramentas das que dispuxo a cidade para o desenvolvemento urbanístico de certos ámbitos estes anos sen PXOM foi o Instrumento de Ordenación Provisional (IOP), unha figura cuxa aplicación está condicionada a que o Concello cumpra unha serie de prazos e aprobe provisionalmente o novo Plan nun máximo de 3 anos e medio. De feito, no caso de Vigo, tivo que ampliarse a vixencia do IOP dado que se superaba o prazo.
