O presidente estatal do PP, Alberto Núñez Feijóo, e o líder do PPdeG, Alfonso Rueda, trasladáronse este venres ata Ponteareas para mostrar o seu apoio a Nava Castro como candidata á Alcaldía e participaron na inauguración da nova sede do PP local.
Os dirixentes populares tiveron a ocasión de participar no acto organizado pola agrupación local xunto a medio milleiro de afiliados e simpatizantes. Acompañáronos, ademais, a secretaria xeral do PPdeG, Paula Prado, e o presidente provincial do PP de Pontevedra, Luís López.
A candidata popular á Alcaldía, Nava Castro, aproveitou a ocasión para pór en valor “a ilusión, as ganas, o compromiso e apoio do seu equipo”. Un extremo que considera fundamental para que “a partir do 28 de maio Ponteareas volva ter a xestión que se merece e precisa para avanzar”.
Tamén agradeceu o apoio que recibe na rúa, asegurando que percibe “moita ilusión” para lograr o cambio a partir de maio: “Coa axuda de todos, conseguiremos a maioría que nos permita devolver aos veciños a ilusión e a tranquilidade de vivir nun concello seguro, que teña todos os servizos e no que a xente viva a gusto”.
