O presidente da Xunta, Alfonso Rueda, insistiu este luns en pedir ao Goberno central que destine a Galicia sete dos 30 trens que está a construír na actualidade para que o AVE chegue “dunha vez e en condicións” ao resto de cidades galegas ademais da Ourense.
Así o sinalou o líder autonómico en declaracións aos medios de comunicación tras a visita ás obras da nova residencia de Aspanaex en Vigo, onde explicou que na carta enviada á ministra de Transportes, Mobilidade e Axenda Urbana, Raquel Sánchez, pediu “o que lle corresponde” á Comunidade.
Neste sentido, urxiu un “compromiso expreso” do Executivo de Pedro Sánchez para que se destinen a Galicia sete trens, o que permitiría aumentar en dous as frecuencias diarias entre Vigo e Madrid e entre Coruña e Madrid.
Os outros tres convois serían destinados á substitución dos actuais, para evitar realizar cambios de vías e así reducir o tempo dos traxectos.
“Creo que é de absoluta xustiza despois de tantos e tantos anos, despois de tantas e tantas promesas, despois de tantos e tantos gobernos. Que chegue dunha vez a alta velocidade e que chegue en condicións”, subliñou, tras indicar que Galicia foi a rexión española onde máis aumentou o uso do ferrocarril para desprazarse a Madrid, cun crecemento do 70%.
“De nada serviría que (o AVE) chegase sen os trens suficientes”, engadiu, subliñado que a Comunidade “ten dereito” a que os trens que reciba sexan os que dispoñan das mellores tecnoloxías.
Ademais, aseverou que tamén pediu a Raquel Sánchez poder ir coñecer os trens que se están construíndo e as probas que se están realizando e que estableza uns prazos de entrega.