Marea de Vigo presentou unha emenda á totalidade dos orzamentos do Concello olívico, redactados polo goberno socialista, xa que, ao seu xuízo, as contas locais teñen que conter “non só partidas adecuadas para dar solución á correcta xestión dos servizos públicos”, senón ser o froito “dun proceso de participación e codecisión dos axentes sociais, veciñais e económicos”, entre outros.

“Por tanto, seguimos demandando abrir a elaboración do orzamento a metodoloxías participativas, a participación previa dos grupos da oposición e aos actores sociais que participan no Consello Social da Cidade”, indica o documento.

Segundo Marea de Vigo, este proxecto de orzamentos para o ano 2020 “xa vén viciado” da forma na que se redactou, no mecanismo no que se presentou publicamente, “a un medio de comunicación antes que aos grupos da oposición e ao resto de medios locais”, e mesmo, ao seu xuízo, “na actitude permanente de non aceptar ningunha das decenas de propostas presentadas polos grupos municipais que inhabilitan calquera intento de mellora”.