Como a música escocesa, que chega triunfal á súa maioría de idade no século XXI, Capercaillie é a banda que medrou con ela, primeiro emerxendo e despois liderando a vangarda do seu actual rexurdimento.
Capercaillie compóñeno algúns dos músicos célticos máis solicitados do mundo. A vocalista principal Karen Matheson -posuidora dunha “gorxa tocada por Deus”, segundo dixo Sean Connery– está considerada como unha das máis finas cantantes escocesas, tendo ampliado os seu rexistros nunha serie de álbums en solitario e tamén en colaboracións a nivel mundial.
Ademais de participar en concertos como o Transatlantic Sessions, ou levar a dirección artística do Celtic Connections de Glasgow, Donald Shaw (acordeón, teclados) é continuamente requirido coma produtor e compositor. Máis recientemente tamén destacou pola banda sonora da exitosa serie da BBC1, Hebrides – Islands On The Edge.
Charlie McKerron, o violinista da banda da costa leste, tamén é recoñecido polas súas habilidades compositivas e proxectos paralelos, incluído o seu papel como violinista no supergrupo Session A9.
De procedencia irlandesa gaeltachd, o guitarrista Manus Lunny é o eixe rítmico da banda dende a súa gravación seminal Sidewaulk, e ademais de escribir e xirar coa banda, dedica gran parte do seu tempo a colaboracións no seu estudo de Donegal.
O extraordinario frautista Michael McGoldrick, considerado como o sucesor do icónico Matt Molloy, dedicou gran parte dos últimos anos a percorrer o mundo como membro da banda de Mark Knopfler; e a sección rítmica: o baixo Ewen Vernal (ex Deacon Blue), o baterista Che Beresford e o percusionista David Robertson, encarnan a síntese perfecta de enerxía e sensibilidade nos seus espectáculos en vivo.
Formación:
- Karen Matheson: Voz
- Donald Shaw: Teclados, acordeón
- Charlie McKerron: Violín
- Manus Lunny: Buzuki, guitarra
- Michael McGoldrick: Frauta, tin whistle, gaita irlandesa
- Ewen Vernal: Baixo
- David Robertson: Percusión
- Che Beresford: Batería
