Bueu mergullarase na sétima arte entre os días 11 e 24 de setembro coa celebración da XV edición do Festival Internacional de Curtametraxes de Bueu (FICBueu), un certame que forma parte da marca provincial Rías Baixas Filme Fest e que levará ao Centro Social do Mar máis de 100 curtametraxes.

Así o anunciaron a presidenta da Deputación, Carmela Silva, a deputada de Cultura, Vitoria Alonso, o director do FICBueu, Manuel Pena, o alcalde de Bueu, Félix Juncal, o concelleiro de Cultura, Xosé Leal, e o director de Agadic, Jacobo Sutil, que acudiron á presentación do evento.

Esta nova edición do FICBueu outorgará o Premio Cinema Galego ao actor Miguel de Lira e contará con pezas internacionais, nacionais e galegas, así como con outras dedicadas ao público infantil ou xuvenil. Como novidade, o festival incorporará unhas xornadas cinematográficas e a programación completarase con actividades paralelas como coloquios, programas de radio ou un mercado.

Durante o acto, a presidenta provincial destacou a aposta deste festival “pola calidade” e polas mulleres na súa dirección e tamén puxo en valor a duración do certame, que nesta XV edición, “unha cifra máxica”, pasa dunha semana a dúas. “Poucos festivais de cinema teñen unha programación tan longa, e de tanta calidade, algo que tamén o identifica e referencia e que supón un enorme esforzo”, destacou.