Miles de persoas colapsaron o centro de Vigo pedindo a fin do “xenocidio” que o Goberno de Israel está cometendo en Gaza. Convocados polo Movemento Democracia en Europa 2025 (DiEM25), os manifestantes partiron do cruzamento de Gran Vía con Urzaiz e percorreron varias rúas da cidade viguesa.
“Paremos o xenocido. Vigo con Palestina” foi o lema dunha protesta que quixo amosar a solidariedade de vigueses e galegos cos palestinos. Corenta colectivos sumáronse á convocatoria. Na manifestación participaron nenos que portaron pancartas para pedir a paz en español, galego, inglés, alemán ou francés, entre outros. Tamén houbo unha performance que simulaba a nais palestinas portando os cadáveres dos seus fillos mortos.
“Facemos un chamamento a todas as persoas demócratas, a todas as conciencias críticas e solidarias e facer das rúas un espazo de denuncia, de dignidade e de esperanza compartida”, indicaron os organizadores. Varias pancartas criticaban duramente o que está acontecendo na franxa palestina e chamaban ao boicot das empresas israelíes.
