A Subdelegación do Goberno en Pontevedra e a Universidade de Vigo puxeron a disposición dos concellos de Ponteareas, Moaña, Lalín, Sanxenxo e Redondela material para as campañas de prevención e loita contra a violencia de xénero de cara ao próximo 25 de novembro, Día Internacional da Eliminación da Violencia contra a Muller.
As campañas foron elaboradas polo alumnado do máster de Publicidade a petición da Subdelegación e teñen un enfoque concreto e dirixido a previr a dobre victimización das mulleres inmigrantes.
Na presentación desta iniciativa participaron este martes o subdelegado do Goberno, Abel Losada; a alcaldesa de Redondela, Digna Rivas; o alcalde de Sanxenxo, Telmo Martín; a alcaldesa de Moaña, Leticia Santos; a tenente de alcalde de Lalín, Paz Pérez Asorey; a concelleira de Igualdade de Ponteareas, Raquel Plana; a decana da Facultade de Ciencias Sociais, Emma Torres; e un grupo de alumnos que participaron nesta proposta.
Abel Losada destacou este “exemplo de colaboración institucional” e tamén de “boas prácticas na implementación de políticas públicas”. Agradeceu tamén a acollida “entusiasta” do cinco concellos que participan nesta primeira experiencia.
Pola súa banda, Emma Torres celebrou que haxa “noticias positivas” en relación coa violencia de xénero e lembrou que fronte a este problema “a loita debe ser global”.
Así, os concellos de Redondela e Sanxenxo implementarán a campaña ‘A Linguaxe da violencia é universal. A resposta tamén o é’. Digna Rivas, alcaldesa de Redondela, lembrou que “o que non se conta non existe” e insistiu en que as administracións teñen “o deber de traballar 365 días do ano contra esta secuela”. Mentres, Telmo Martín, alcalde de Sanxenxo, indicou que “isto non vai de cores políticas”.
Mentres, Moaña e Lalín desenvolverán a campaña ‘Barreras. Ollo pechado’. A alcaldesa, Leticia Santos, remarcou “a sensibilidade e o bo gusto do alumnado” e celebrou que o deseño salga dun máster dunha universidade pública. A tenente de alcalde de Lalín, Paz Asorey, afirmou que “hai que empezar a loitar contra a violencia de xénero desde o berce”. Finalmente, Ponteareas optou pola campaña ‘Detecta e actúa. Ti podes evitalo’.
