Axentes ambientais da Unidade de Investigación de Incendios Forestais (UIFO) informaron do achado de novos indicios de intencionalidade para provocar un lume na zona forestal XVIII pertencente á demarcación de Vigo-Baixo Miño.

En concreto, segundo indica a Consellería de Medio Rural nun comunicado, o elemento achado é unha cabicha. Precisamente, xa se atopou unha cabicha de ignición na zona onde se produciu un conato de incendio o pasado 23 de xullo, polo que o departamento autonómico apunta ao mesmo ‘modus operandi’ no mesmo distrito.

Segundo alertou a Administración autonómica, esta vía do cigarro equipado cun sistema de ignición permite ao incendiario depositalo no monte e prender lume de forma retardada, o que lle facilita poder distanciarse do lugar.

DETECCIÓN DE LUMES

Desde a UIFO sinala que o seu labor está “a dar froitos” no descubrimento de indicios de intencionalidade, sobre todo nas “últimas semanas”. Así, o pasado 28 de xullo no distrito forestal XIX, pertencente á área de Caldas-O Salnés, estes efectivos atoparon papeis de xornais amontoados.

Dous días despois, mentres membros da unidade refrescaban unha zona onde se produciu un conato de lume –no distrito forestal III área de Santiago-Meseta Interior– descubriron unha pastilla de aceso.