O proxecto ‘Youth for Sexa’, impulsado pola Cooperatica de Armadores de Pesca do Porto de Vigo (ARVI), lanzou o seu primeiro concurso nacional ‘Mozos por unha pesca sustentable‘, co que pretende involucrar á mocidade na procura de solucións de futuro para a pesca e os océanos.
Desta maneira, ata o próximo 30 de abril, todos os mozos de entre 13 e 18 anos poderán participar a través de diferentes tipoloxías de actividades (fotografía, vídeo, receitas e relatos/redacción) englobadas en catro categorías: comercio e consumo sustentable de produtos pesqueiros, activismo social participativo na pesca para protexer os mares, mellor receita gastronómica con peixe sustentable e imaxinando un futuro de pesca sustentable.
Segundo informou ARVI, de entre todas as propostas que se reciban, o xurado eligirá a catro gañadores que se darán a coñecer o 8 de xuño. O premio consistirá nunha viaxe á cidade de Vigo, visitando o seu porto pesqueiro e as Illas Cíes. A entrega oficial dos premios realizarase o 8 de xullo no marco da inauguración da Feira Vigo SeaFest.
Ademais, no marco de actividades de ‘Youth for Sexa’, este venres presentarase a campaña aos alumnos do IES Valladares de Vigo, co obxectivo de impulsar a participación dos adolescentes. Ao longo deste mes presentarase noutros institutos como o IES Atalaia de Conil e o IES San Pedro de Pinatar de Murcia.
