O Diario Oficial de Galicia (DOG) publica este luns a aprobación do novo Plan Reitor de Uso e Xestión (PRUX) do Parque Natural Monte Aloia, un instrumento de ordenación específico que entrará en vigor o 14 de marzo.

Nun comunicado, a Consellería de Medio Ambiente destacou que o texto detalla os obxectivos e criterios principais a seguir á hora de xestionar os distintos aproveitamentos, tanto públicos como privados, deste espazo.

Cunha vixencia mínima de 10 anos, este é o segundo PRUX do Monte Aloia xa que o anterior foi aprobado en 2009. O Goberno galego sinalou que responde así á necesidade de dotar a este espazo dun instrumento de xestión propio, moderno e actualizado que desenvolva as directrices recollidas no seu Plan de Ordenación de Recursos Naturais (PRON) e que estableza, á vez, as previsións de actuación da Administración dentro do seu ámbito.

Con todo, a Xunta sinalou que o novo documento non fixa novas limitacións nin é máis restritivo que o PORN aprobado en 2001. Neste sentido, indicou que, ante todo, busca clarificar e sistematizar a normativa existente co fin de contar cunha regulación única que compatibilice cada un dos usos permitidos coa conservación da biodiversidade deste espazo.

O departamento que dirixe Ángeles Vázquez destacou que a aprobación deste documento enmárcase no proceso de actualización normativa impulsado pola Xunta nos últimos anos co fin de dotar ao seis parques naturais que existen en Galicia dunha folla de ruta específica e adaptada ás súas necesidades e características particulares.

Así, Medio Ambiente lembrou que os PRUX son ferramentas de ordenación nas que se detallan os obxectivos e as pautas de xestión que rexen en cada espazo natural por un período de tempo limitado. Á vez, protexen e regulan os usos e aproveitamentos permitidos en cada unha das zonas identificadas dentro dos parques e concretan as actuacións a desenvolver en materia de conservación, uso público ou investigación, entre outros.