O goberno municipal de Vigo anunciou un plan de limpeza e retirada de maleza e residuos en toda a canle do río Lagares, a pesar de que dita tarefa “é competencia exclusiva” da Xunta de Galicia, que ten ese río “abandonado”, asegura o alcalde, Abel Caballero, quen subliñou que, nestes días, debido ás fortes choivas, o caudal creceu e formáronse “pequenas presas naturais” polas ramas e troncos que se acumulan no leito do río.
Segundo denunciou, a atención do goberno galego ao Lagares é “cero patatero”, polo que o Concello “se vai quedar coa xestión” do río, a pesar de ser “dominio autonómico”. “Xa estamos a facer un proxecto para limpar a maleza e residuos, imos actuar en toda a canle do río (que discorre na súa totalidade polo termo municipal vigués). Ímonolo quedar, e dános igual o que diga ou faga a Xunta“, proclamou Abel Caballero.
O rexedor lembrou que, cando chegou ao goberno da cidade hai 12 anos, o Lagares sufría verteduras contaminantes “practicamente a diario”, e actualmente é un río “extraordinario en termos ambientais”. “Hai pesca, hai patos… está atendido”, presumiu o alcalde.
“RESPONSABILIDADE” DO CONCELLO
Pola súa banda, a Xunta saíu ao paso destas manifestacións de Abel Caballero, lembrando que o Concello de Vigo “ten a responsabilidade de limpar e manter en bo estado de conservación o tramo urbano do río Lagares”, tal e como lle trasladou “en innumerables ocasións”, de acordo co que establece o Plan Hidrolóxico Nacional.
“A lexislación fixa como unha responsabilidade dos concellos actuar nos tramos urbanos dos ríos, así como en todas as infraestruturas das marxes que sexan da súa titularidade”, precisaron fontes autonómicas, que engadiron que a Xunta se encarga da limpeza e conservación de 15.000 quilómetros de canles, mentres que os concellos fano en 300 quilómetros.
Finalmente, incidiu en que o Concello olívico “ten o deber de contribuír a mellorar o estado de conservación do río Lagares” e “non hai escusas”. Así mesmo, sobre a transferencia do río, reclamada por Abel Caballero, a Xunta matizou que dita transferencia é “contraria á lei estatal de augas, á lei autonómica de Augas de Galicia e ao propio Estatuto de Galicia”.
