A cidade olívica súmase ás máis de 2.000 convocatorias de 155 países que celebran a semana mundial polo clima a partir deste luns e que inclúe a folga internacional polo clima o 27 de setembro.
Desde este luns Vigo organiza unha serie de actividades reivindicativas que culminarán con “unha das maiores mobilizacións a favor do clima a nivel mundial” o 27 de setembro. O obxectivo desta convocatoria é “esixir a declaración, por parte das diferentes institucións, do estado de emerxencia climática e a adopción urxente de diferentes medidas para combater e contrarrestar os efectos do cambio climático”.
Así o manifestaron varias organizacións, entre as que destacan ‘Fridays for Future’ de Vigo e o Movemento Galego polo Clima, que conta co apoio de máis de 60 asociacións galegas que secundarán a iniciativa “axuntando as súas forzas”.
Desta maneira, a partir do luns haberá actividades de visibilización do problema climático, presentación de alternativas ao sistema de produción actual, actos pola soberanía alimentaria, concentración durante a mañá do 27S e a manifestación polo clima o mesmo día ás 20,00 horas desde Vía Norte.
Para finalizar, o domingo as entidades prevén realizar unha recollida de lixo no río Lagares ás 11,00 horas como broche da semana mundial polo clima.
