A Garda Civil investiga penalmente a un veciño de Vigo como presunto autor dun incendio forestal en Cangas debido a unha posible neglixencia con ocasión dunha queima de restos forestais.

O lume produciuse o pasado mes de maio con motivo dunha queima de restos agrícolas que estaba a realizar o propietario dunha leira na parroquia de San Salvador de Coiro, ao propagarse o lume a un arboredo contiguo, que tamén é do mesmo dono.

Segundo as investigacións realizadas polos efectivos da patrulla do Seprona de Cangas, púidose concluír que o propietario da leira, que ten o seu domicilio habitual en Vigo, aínda que notificara a realización da queima, estaba a realizala un día antes dos días que tiña autorizados.

“O incendio púidose producir como consecuencia do inadecuado control que esta persoa debería ter exercido sobre o lume e, sobre todo, pola carencia de medios ao seu alcance que lle permitisen evitar e, no seu caso, remediar, calquera eventualidade como a que se produciu”, explica o atestado do Seprona, segundo recolle a Garda Civil nun comunicado.

Nos labores de extinción do incendio participaron varios efectivos do Posto Principal da Garda Civil e Policía Local de Cangas, un axente forestal e efectivos de Protección Civil de Cangas. As dilixencias instruídas entregáronse no Xulgado de Instrución de garda de Cangas, onde deberá comparecer o investigado cando sexa citado.