A zona afectada polo lume orixinado en Ponteareas en 2017, en concreto, na parroquia de Padróns, atópase en proceso de rexeneración e realízanse labores de prevención de incendios.
A área afectada tamén comprende os municipios pontevedreses de Pazos de Borbén, Fornelos de Montes, Soutomaior, Mondariz, Pontecaldelas e Cotobade.
Este martes reuniuse a comisión de seguimento do proxecto, impulsado polo Banco Santander e a Consellería do Medio Rural, segundo recolleu a segunda nun comunicado.
O orzamento total das actuacións ascende a 860.000 euros e permitirá levar a cabo unha rexeneración ambiental e paisaxística. Así, cambiarase o uso de dúas parcelas e realizaranse tratamentos para a vexetación en 72 hectáreas, ademais de plantarse ata 105.000 árbores.
