O Concello de Vigo denunciará nos xulgados os danos causados no monumento a José Elduayen, froito de “un acto de vandalismo“, segundo avanzou este martes o alcalde olívico, Abel Caballero.

O rexedor confirmou, en declaracións aos medios, que a Policía Local iniciou “investigacións” para tratar de localizar ao responsable ou responsables das desfeitas causadas nunha das figuras de bronce do monumento, que se atopa nos xardíns de Montero Ríos.

Segundo incidiu, estes danos ao patrimonio artístico “non son un efecto do botellón”, senón un acto de “vandalismo” do que teñen que responder os seus autores diante dos xuíces. “Son xente carente de sentido común, que están na raia da delincuencia”, lamentou o alcalde.