A Consellería de Medio Ambiente e Cambio Climático, de conformidade co establecido na lei de caza de Galicia, declarou como zona de seguridade para os efectos cinexéticos os terreos da Comunidade de Montes Veciñais en Man Común de Beade, no Concello de Vigo. Así o publica este luns en Diario Oficial de Galicia (DOG), que recolle a delimitación deste monte para os efectos de zona de seguridade para a caza.

Tal como se recolle na citada lei, zonas de seguridade son aquelas nas cales hai que adoptar medidas precautorias especiais para garantir a integridade física e a adecuada protección das persoas e bens. “Prohíbese en todas as zonas de seguridade circular con armas cargadas, usalas ou disparar en dirección a elas de modo que poidan ser alcanzadas, con perigo para as persoas ou os seus bens, salvo que se dispuxese de autorización expresa para cazar nese terreo”, engade a lei.