O Xulgado de Instrución número 2 de Vigo notificou a Ecoloxistas en Acción a apertura de dilixencias previas para investigar a vertedura contaminante procedente de Afouteza, a cidade deportiva do Real Club Celta de Vigo. Tal como informaron os ecoloxistas, o auto xudicial é anunciado varias semanas despois de que a organización interpuxese unha denuncia solicitando que se abrisen dilixencias penais contra o clube por delito contra o medioambiente e contra a saúde pública, xa que a vertedura das instalacións de Mos está vertendo residuos sobre mananciais das traídas veciñais das parroquias de Tameiga, Petelos e Sanguiñeda.

No seu día, os ecoloxistas entregaron ao xulgado os resultados dunha analítica da vertedura que reflicte “unha altísima concentración de feces e tamén a presenza de varios compostos químicos asociados aos pesticidas e fertilizantes habitualmente utilizados no coidado e mantemento dos campos de fútbol”. “A vertedura contaminante procedente de Afouteza é claramente un delito contra os recursos naturais ao ambiente, pero tamén un delito contra a saúde pública. A poucos metros, ladeira abaixo, atópanse varios mananciais das traídas de auga que corren un grave risco de contaminarse, se non o están xa”, engadiu Ecoloxistas en Acción.

“Desde que tivemos coñecemento da contaminación puxemos toda a información a disposición do Concello de Mos, pero o goberno local non actuou para atallar este problema, sabendo que ladeira abaixo se atopan varias captacións de auga das que beben gran parte dos veciños de Mos”, lamentou o coordinador do grupo local de Ecoloxistas en Acción, Xaquín Pastoriza.