Arredor de sesenta persoas participaron este domingo na xornada de eliminación de especies invasoras organizada polo Furatoxo na parroquia do Hío (Cangas). A iniciativa, que contaba coa colaboración da Comunidade de Montes do Hío e da cooperativa Pouso da Serra, desenvolveuse ao longo da mañá nunha extensa parcela próxima á area das Porteliñas.

Esta superficie, talada meses atrás, precisaba dunha actuación para evitar os gromos de eucalipto. O tempo, inestable durante toda a fin de semana e con chuvascos intermitentes, non conseguiu desanimar aos voluntarios que se achegaron ao monte do Hío.

A xornada comezou ás dez e media da mañá coa presentación da iniciativa a cargo de Manuel Crujeiras, membro da A.C. O Furatoxo, e cunha explicación da actuación e do procedemento a seguir do técnico forestal David Álvarez Graña.

“A importancia deste tipo de actividades non se limita unicamente a un beneficio ambiental, senón que axuda á concienciación da sociedade co entorno que nos rodea. Ao longo das tres horas de duración, o traballo levado a cabo polo voluntariado centrouse tanto na eliminación dos gromos de eucalipto coma en retirar a carapa dos cepos de eucalipto, unha acción moi pouco vistosa pero moi efectiva”, lembran desde a asociación.

Grazas á gran participación, o voluntariado puido relevarse nas distintas tarefas e incidir nunha superficie moito máis extensa da prevista inicialmente. A xornada rematou cun aperitivo a cargo da Comunidade de Montes, que quixo agradecer así a participación e a disposición das arredor de sesenta persoas que se achegaron.

Dende O Furatoxo amósanse moi contentos polas numerosas persoas que se achegaron á convocatoria, superando as súas propias expectativas, mais sobre todo pola resposta tan positiva que recibiron tanto a través das redes sociais coma a nivel persoal.

Trátase da segunda xornada de eliminación de especies invasoras que organizan e, visto o éxito, continuarán nos próximos meses con máis accións así.