A Consellería de Infraestruturas e Mobilidade, a través de Augas de Galicia, eliminou dous puntos de verteduras de augas residuais procedentes dunha instalación industrial asentada no concello pontevedrés de Vilaboa. Segundo informou a Xunta, estes focos foron localizados nas inspeccións rutineiras realizadas polos técnicos do Plan de Control de Verteduras, xunto coa Gardería Fluvial de Augas de Galicia.
Así, identificaron a orixe destes puntos nunha liña de xestión das augas industriais xeradas na actividade, susceptibles de producir verteduras en condicións inadecuadas ao dominio público. Ante a deficiencia observada, os técnicos requiríronlle aos responsables das instalacións a adopción das medidas correctoras oportunas. Os responsables da empresa procederon ao selado de dous puntos da liña susceptibles de ocasionar verteduras, solucionando así as verteduras irregulares ao dominio público hidráulico, como verificaron os técnicos da Xunta nunha nova inspección.
