Os rexedores do Porriño e Mos, Alejandro Lorenzo e Nidia Arévalo (ambos os do PP), desmarcáronse este mércores da posición trasladada nas últimas horas polo alcalde de Vigo e outros responsables municipais da comarca (que criticaron a falta de medidas da Xunta ante a seca), e aseguraron que fixeron ” os deberes” nos seus concellos e non están dispostos a ser “cómplices” do “circo” que, ao seu xuízo, escenificaron.
Nun comunicado conxunto, os gobernos locais do Porriño e Mos sinalaron que participaron na reunión convocada por Abel Caballero este martes “con actitude construtiva” e para “coordinar actuacións” ante a situación de seca. Con todo, denunciaron, ese encontro tivo como obxectivo de “facer demagoxia” e obter “rédito político”, polo que Alejandro Lorenzo e Nidia Arévalo trasladaron o seu “total desacordo” coa posición de Abel Caballero que, “unha vez máis, só busca o circo mediático e a confrontación política”.
Segundo precisaron, non están “en rebelión contra ninguén, e moito menos contra a Xunta de Galicia”, porque fixeron o seu “traballo”. Así, lembraron que na planta potabilizadora que dá servizo a estes municipios realizouse unha auditoría para detectar e liquidar as fugas, que se activou o plan emerxencia do Consorcio de Augas do Louro e que están a aplicar medidas de redución do consumo de auga “desde hai dous meses”.
“Fixemos os deberes, e non imos consentir que quen non os fixo pretenda facernos cómplices do seu circo”, sentenciou, á vez que lembraron que, se a pretensión coa reunión do martes era buscar solucións e coordinar actuacións, como rezaba a convocatoria, debería convocarse a outro concello que tamén se abastece da presa de Eiras, como Soutomaior, e á propia Xunta de Galicia.
Ademais de representantes destes dous concellos, na reunión deste martes, celebrada na Alcaldía de Vigo e convocada por Abel Caballero, participaron as alcaldesas de Moaña (do BNG), Redondela e Salceda (PSOE); o tamén socialista rexedor de Gondomar; e a alcaldesa de Cangas (ACE).
