O grupo porriñés Zendal adquiriu o 46% da empresa catalá Maymó, especializada no ámbito da saúde animal. Segundo trasladou este martes a compañía con base no municipio pontevedrés do Porriño, a biotecnolóxica convértese no novo socio estratéxico deste grupo integrado por Laboratorios Maymó –situada en Barcelona–, Iven –con sede en Madrid– e Mayvet –filial en México–.
A operación enmárcase na estratexia de crecemento de Zendal, que ten no campo da saúde animal un dos seus campos primordiais. A alianza das compañías galega e catalá pretende “impulsar e reforzar a súa aposta pola investigación e a innovación con proxectos en común”, segundo resalta Zendal nun comunicado.
