A organización do XIX Festival de Cans deu a coñecer este xoves a selección dunha ducia de curtametraxes que competirán na sección Furacáns, dedicada ás obras de non ficción que asumen “maior risco narrativo”, entre as que haberá 8 estreas (seis estreas absolutas e dúas estreas en Galicia).

O certame, que este ano se celebra do 18 ao 21 de maio, volveu apostar pola mirada de cineastas mulleres, e unha decena das curtas que concursan son obras asinadas por elas: Diana Toucedo, as irmás Also Sisters, Adriana Páramo, Aldara Pagán, Andrea Beade, Quiela Nuc, Claudia Pineda, Lucía Alonso, Antía Encisa, Yasmina Farahni e Silvia Muíña.

Así, no Festival de Cans proxectaranse as curtas ‘Noche de 2202’ (David Outón); ‘El viaje, 1988’ (Claudia Pineda); ‘Tatuado nos ollos levamos o pouso (Diana Toucedo); ‘Una sola nación’ (Silvia Muíña); ‘O que queda’ (Alejandro Rodríguez); ‘Autorretrato’ (Aldara Pagán); ‘Nós-Outros’ (Alicia Alonso); ‘Anatomía dunha serea’ (Adriana Páramo); ‘Aura’ (Also Sisters); ‘A cinquito, con derecho a tocar’ (Andrea Beade e Quiela Nuc); ‘Somos’ (Antía Encisa); e ‘Galice, Galice’ (Yasmina Farhani).

A competición da categoría Furacáns terá lugar o 21 de maio e xa se puxeron á venda as entradas para a sesión matinal e de tarde.