Os casos activos continúan en ascenso en Galicia e superan este domingo a barreira dos 70.000 —72.441, concretamente–, mentres que os novos contaxios baixan dos 8.000 e quedan nos 7.838 –776 menos nas últimas 24 horas–. A presión hospitalaria tamén se incrementa con 569 hospitalizados, 30 máis que na última xornada. A taxa de positividade, pola súa banda, continúa en descenso e marca un 21,8%.

Segundo os datos actualizados na mañá deste domingo pola Consellería de Sanidade con rexistros ata as 18,00 do sábado, baixan a 54 as persoas ingresadas en UCI pola Covid-19 en Galicia –dúas menos–, pero ascenden a 515 as hospitalizadas noutras unidades –32 máis–. Por áreas sanitarias, a presión hospitalaria sobe en todas, menos na Coruña. Así, concretamente en Vigo, mantéñense 10 pacientes Covid en UCI pero rexistra 78 noutras unidades –catro máis–.

CASOS ACTIVOS

Os casos activos manteñen a tendencia ascendente e o maior incremento corresponde á de Vigo (+1.158), tras sumar na última xornada 2.129 novos casos abertos. Á área viguesa séguelle a da Coruña e Cee (+611), Pontevedra e O Salnés (+407), Lugo (+333), Santiago (+123), Ourense (+59) e Ferrol (+33). Así, con máis casos activos mantense a área sanitaria de Vigo, con 18.647.

Segundo os últimos datos actualizados polo Ministerio de Sanidade este pasado venres 14 de xaneiro, a incidencia acumulada a 14 días de Galicia aumenta a 3350,78 casos por 100.000 habitantes, fronte aos 3192,46 de media en España.