A área Sanitaria de Vigo realizará este domingo un cribado poboacional cunhas 6.000 persoas convocadas no Porriño, tras un gromo de Covid-19 detectado nunha empresa deste concello. As probas realizaranse no polideportivo municipal entre as 8,30 e as 22,00 horas.

A alcaldesa do Porriño, Eva García, explicou que este cribado “está relacionado coa aparición dun gromo nunha empresa” do concello. Ademais, puntualizou que “aínda que a incidencia no Porriño segue sendo moi baixa e que os infectados nesta empresa son na súa maior parte residentes noutros concellos, o Sergas trata de determinar se hai contaxiados que sexan asintomáticos, tanto na vila como na contorna”.

Por iso, a alcaldesa, que matiza que O Porriño ten unha taxa de incidencia de 15 que “son os mellores números de toda a pandemia”, apelou a que as persoas convocadas ao cribado “por favor acudan polo seu ben, polas súas familias e polo ben de todos”.