O Pazo de Mos, situado na antiga calzada romana que unía Bracara Augusta (a actual Braga) con Tui e Santiago a través do Camiño Portugués, estrea sistema eléctrico tras un investimento de 25.000 euros achegados pola Administración autonómica. Este edificio do século XVII situado no municipio de Mos foi visitado na mañá deste sábado polo vicepresidente primeiro da Xunta, Alfonso Rueda, e a directora de Turismo de Galicia.

A actuación desenvolvida pola Xunta neste inmoble, que serve como elemento turístico e albergue de peregrinos, encádrase no Plan Estratéxico de Turismo de Galicia 2020, que ten como obxectivo “consolidar a comunidade galega como destino competitivo”, segundo destaca a Xunta nun comunicado.

En 2020, o Pazo de Mos recibiu a certificación ‘Q de Calidade Turística’ xunto a outros elementos do patrimonio galego como a Carballeira e Xardín Botánico de Caldas de Reis, a Fortaleza de Salvaterra do Miño, parque infantil Aldea dos Grobits (O Grove) e a Rede de Miradoiros de Sober.