O matrimonio que apareceu morto á primeira hora da tarde deste luns no Porriño presentaba feridas por arma de fogo, segundo confirmaron a Europa Press fontes da Garda Civil, que está a investigar o crime como un acto de violencia de xénero.

O Instituto Armado sinalou que se descarta a participación de terceiras persoas neste suceso, e que non constan denuncias previas por malos tratos no ámbito familiar. Aínda así, fontes do TSXG apuntaron que “todo indica que se trata dun caso de violencia machista”, e que a parella cesara a súa convivencia hai poucas semanas.

O achado dos cadáveres produciuse pouco antes das 15,00 horas, no domicilio da parella, na parroquia porriñesa de Chenlo. Segundo apuntou do CIAE 112, ás 14:50 horas un fillo da parella chamou a emerxencias para alertar de que atopara aos seus pais mortos na vivenda familiar, no lugar das Filgueiras.

O 112 Galicia informou do ocorrido á Garda Civil, que desprazou axentes até o lugar e iniciou a investigación correspondente, de momento coa hipótese principal de que se trata dun caso de violencia de xénero.

O Instituto Armado solicitou ao 112 o apoio do Grupo de intervención psicolóxica en catástrofes e emerxencias (Gipce), para dar atención psicolóxica aos familiares dos falecidos.

CONCENTRACIÓN

Por outra banda, a alcaldesa do Porriño, Eva García da Torre, desprazouse esta tarde ao lugar para transmitir as súas condolencias aos dous fillos da parella, e ao resto de familiares.

Ademais, a corporación municipal convocou unha concentración silenciosa este martes, ás 12:00 horas, fronte ao Concello, para mostrar o seu pesar por ese suceso.

Dáse a circunstancia de que, de confirmarse, sería o primeiro caso dunha muller vítima mortal por mor da violencia de xénero no que vai de ano en Galicia. O pasado ano pechouse con tres mulleres asasinadas polas súas parellas ou exparellas.