O sindicato CC.OO. remitiu unha carta ao vicepresidente primeiro e conselleiro de Economía, Industria e Innovación, Francisco Conde, para solicitarlle unha reunión urxente ante a “grave situación” que atravesa a empresa do sector metal Ganomagoga, con talleres en Ponteareas e Mos.

Así, a central apuntou que a empresa foi referente nesta industria (en actividades como o naval, o eólico ou a biomasa) durante moitos anos pero actualmente arrastra problemas de carga de traballo e falta de liquidez, que se traducen en atrasos no cobro das nóminas do persoal.

“Pero o peor da situación é a falta total de información por parte da dirección, que xera unha maior incerteza sobre o futuro da mesma, tanto nas persoas traballadoras como en empresas provedoras e clientes”, apuntaron desde CC.OO.

Por iso, urxiron unha reunión con Conde para coñecer “máis en concreto” a situación da mercantil e analizar posibles medidas que garantan a continuidade da unidade produtiva e os postos de traballo.

O grupo Ganomagoga, ademais dos talleres de Mos e Ponteareas, canto con outras dúas filiais: Aplimega (conservación e mantemento de elementos metálicos) e Cedval (antiga calderería de Wärtsilä Ibérica en Vigo).