O Agrupamento Europeo de Cooperación Territorial do Río Miño (AECT Rio Minho) foi escollido pola Comisión Europea (CE) e a Organización para a Cooperación e o Desenvolvimiento Económico (OCDE) como unha das cinco rexións europeas que participarán nun proxecto piloto que pretende mellorar a gobernación nos espazos transfonterizos e aumentar a calidade de vida da cidadanía.
O proxecto ‘Construír rexións transfronteirizas máis resilientes’ porase en marcha despois dunha reunión presencial que se celebrará o vindeiro mércores en Bruxelas e terá unha duración de 15 meses.
Durante este tempo, a iniciativa terá como obxectivo prioritario axudar ás rexións transfronteirizas escollidas a mellorar a gobernación a través do desenvolvemento conxunto de iniciativas de cooperación entre as administracións das zonas involucradas.
En particular, este proxecto analizará a posibilidade da creación conxunta e a implementación de políticas públicas, por exemplo a política fiscal transfronteiriza, así como de acordos en materia de atención médica, transporte e educación para “mellorar a calidade de vida dos cidadáns”.
Os países que participarán nesta iniciativa coas súas respectivas zonas transfronteirizas son: Bélxica e Francia, pola Eurometropolis Lille-Kortrijk-Tournai; Francia e Luxemburgo, a través do GECT Alzette Belval & Pôle Métropolitain Frontalier du Nord Lorrain; Lituania e Polonia, a través da Eurorrexión Niemen; e Andorra, Francia e España a través da Comunidade de Traballo dos Pireneos; e España e Portugal, co AECT Rio Minho.
UXÍO BENÍTEZ REPRESENTARÁ A PONTEVEDRA EN BRUXELAS
Este mércores celebrarase un encontro entre todos as administracións correspondentes que servirá como inauguración para o proxecto. Este evento contará coa presenza do deputado de Mobilidade Alternativa e Espazos Públicos e Cooperación Transfronteiriza da Deputación de Pontevedra, Uxío Benítez, como un dos representantes do ‘AECT Rio Minho’.
Segundo a Deputación, este encontro ten como principal obxectivo “familiarizar” ás rexións piloto cos diferentes compoñentes da iniciativa e tentear as ferramentas que se desenvolverán para apoiar a “gobernación multinivel transfronteiriza”.
Desta forma, os representantes destas rexións poderán intercambiar ideas e puntos de vista sobre “como se pode fortalezer o investimento e a prestación pública dos servizos transfronteirizos”. A Deputación tamén espera que a reunión “brinde claridade sobre a participación esperada” do resto de rexións piloto e do OCDE na implementación do proxecto.
