A Central Unitaria de Traballadoras (CUT) criticou que tanto a empresa como outros sindicatos pretendan a suspensión do laudo arbitral que declarou nulas as eleccións sindicais en Stellantis Vigo.
Nun comunicado, a CUT lamentou que tanto CC.OO. como a compañía automobilística solicitasen como medida cautelar a suspensión da execución do laudo ata que non se resolva de forma xudicial, cando a dirección da empresa “non o está aplicando, coa complicidade de CC.OO., SIT e UGT”.
A pesar de que para hoxe estaba prevista unha vista das cautelares no xulgado, finalmente non se puido levar a cabo debido a que non se remitiu ás partes toda a documentación. Por iso, será o martes 20 cando se celebre de novo a vista.
O sindicato lembrou que o xulgado do social número 2 non aceptou as medidas cautelares propostas pola SIT, pero ese sindicato tamén pediu que a súa demanda se acumule á de CC.OO. “e supomos que a de UGT seguirá o mesmo camiño”.
“Está claro que todas as partes están aliñadas e en complicidade para que o laudo quede sen efecto e non se repitan as eleccións sindicais en Stellantis Vigo”, sentenciou a CUT.
