O Consorcio Zona Franca de Vigo reuniu este venres na cidade olívica ás principais organizacións do terceiro sector e empresas punteiras en responsabilidade social empresarial nunha xornada pioneira co obxectivo de xerar un espazo de colaboración que sirva de modelo para pór sobre a mesa propostas pola sustentabilidade.

Segundo informou Zona Franca nun comunicado, máis dun centenar de persoas seguiron o seminario ‘A responsabilidade social empresarial como estratexia de cooperación entre actores’. Nel, participaron membros das empresas Nova Pescanova, Vegalsa Eroski e Jealsa, así como das organizacións Unicef, Rede polo Emprego Conect@ Vigo, Amencer Aspace, Banco de Alimentos e o Instituto para o Crecemento Sustentable da Empresa.

Durante o acto, o delegado de Zona Franca de Vigo, David Regades, sinalou que “traballando unido o terceiro sector, as empresas, a academia e a universidade pódese contribuír a xerar un impacto maior sobre o territorio”.

Regades tamén subliñou que “a responsabilidade social está a converterse nun elemento estratéxico de moitas empresas“. “Na man temos a capacidade de realizar accións concretas que contribúan á consecución da Axenda 2030, a folla de ruta marcada por Nacións Unidas”, sentenciou.