O Concello de Vigo recibiu 6,4 millóns de euros de fondos europeos para programas de rehabilitación de vivendas, segundo anunciou este venres o alcalde, Abel Caballero.
En rolda de prensa, o rexedor explicou que a cidade presentou unha petición de axudas para 12 barrios enmarcadas no programa de Contornas Residenciais de Rehabilitación Programada. Os fondos financian polo menos o 40% do investimento.
Precisamente, oito desas zonas tamén están recoñecidas como Áreas de Rehabilitación Integral, polo que xa gozan doutro tipo de subvencións, como é o caso do Casco Vello ou de Bouzas.
Caballero puxo en valor que Vigo recibirá 6,4 millóns do total de 11 millóns que o Goberno central outorgou a Galicia dos fondos europeos para a rehabilitación de vivendas.
