Vigo busca a mellor tapa da cidade co VIII edición do concurso de tapas ‘Pestisquiño’, un evento organizado polos Hostaleiros da provincia de Pontevedra e os hostaleiros de Vigo que se celebrará desde este xoves ata o próximo 29 de novembro.
A presentación do evento tivo lugar este mércores no restaurante ‘O Templo do Sensei’. Nela estiveron presentes o presidente da Federación Provincial de Empresarios de Hostalaría de Pontevedra (Feprohos), Cesar Sánchez-Ballesteros; o alcalde de Vigo, Abel Caballero; a concelleira de Turismo e Mocidade, María del Carmen Lago; e o concelleiro e deputado provincial Santos Héctor Rodríguez.
Un total de 25 establecementos da cidade olívica participarán no VIII edición do concurso de tapas ‘Pestisquiño’. Cada un deles farao cunha tapa cuxo prezo oscilará, en palabras de Sánchez-Ballesteros, entre os dous e catro euros.
Con este evento, o presidente de Feprohos asegurou que se busca “promocionar os locais de hostalaría da cidade” e “aínda que nesta edición se conte cun menor número de participantes, o nivel é máis alto que nunca”.
Pola súa banda, Abel Caballero sinalou que o ‘Petisquiño’ é unha “mostra da excelencia que está a alcanzar a hostalaría de Vigo”, ademais de “un prólogo magnífico para o Nadal”. Así mesmo, o rexedor vigués animou á xente a participar así como a “pararse a felicitar aos cociñeiros para agradecer o seu gran labor” non sen antes asegurar que a gastronomía de Vigo é “a mellor do Planeta”.
NOVIDADES
Esta nova edición do Petisquiño, a oitava, conta con importantes novidades xa que por primeira vez todas as persoas que se animen a probar as tapas dos 25 establecementos participantes poderán votar a través dunha aplicación móbil.
Ademais, este ano elixirase ao gañador o próximo 1 de decembro cunha final que terá lugar no hotel Attica 21 na que o cinco establecementos máis votados replicarán a súa tapa ante un xurado profesional.
