A ‘vella Pescanova‘ rexistrou unhas perdas de 6,8 millóns de euros no terceiro trimestre deste ano, fronte ao beneficio de 64.000 euros que se anotou no mesmo período do exercicio precedente, segundo informou a compañía á Comisión Nacional do Mercado de Valores (CNMV).

Os ingresos de explotación foron de 210.000 euros, por encima dos 200.000 euros dun ano antes, correspondentes principalmente a parte do apoio anual que a sociedade debe recibir de Nueva Pescanova, en virtude dos acordos de segregación aprobados pola xunta xeral do 25 de setembro de 2015.

Así mesmo, os gastos do terceiro trimestre deste ano corresponderon principalmente a gastos xerais, de asesores externos, de remuneración do consello (45.000 euros), provisións (4,65 millóns de euros) e deterioro participacións (1,68 millóns de euros).

A sociedade presentou ao peche do terceiro trimestre deste ano un patrimonio neto negativo de 4,95 millóns de euros. Ao longo do terceiro trimestre, a firma non realizou investimentos ou desinvestimentos significativos.