O portavoz municipal do PP de Vigo, Alfonso Marnotes, denunciou este martes a “baixa execución orzamentaria” do goberno local de Abel Caballero, cifrando o grao de investimento “real” en 11 millóns de euros fronte aos 120 millóns orzados, é dicir, un 9%.
Neste sentido, Marnotes cualificou de “escandaloso” o esborralle do investimento municipal en practicamente todos os capítulos do exercicio orzamentario, como obras, emprego, política social, persoal e deportes.
Segundo el, Caballero é un “home anuncio”, polo que reprochou que o alcalde anunciase ata 15 obras de calado para a cidade que, polo momento, seguen sen data de inicio.
“Se non é capaz de gastar, entón que baixe os impostos”, lamentou Marnotes, engadindo que faltan policías, bombeiros e persoal de servizos sociais, a pesar de que non se gasta todo o orzamento destinado a cubrir estas vacantes.
