O consorcio Zona Franca de Vigo ofreceuse a estudar a posibilidade de atopar emprazamentos provisionais para as seis empresas afectadas polo incendio que a pasada fin de semana calcinou cinco naves no polígono industrial do Rebullón, en Mos.
Este luns, o delegado de Zona Franca de Vigo, David Regades, remitiu unha carta ao presidente da Asociación de Empresarios de Mos (Aemos), Manuel Castro, para manifestar a súa solidariedade polo sucedido.
Na misiva, mostra a súa disposición para estudar localizacións provisionais para que as empresas afectadas “poidan retomar a súa actividade” na medida do posible.
Tamén ofrece ás compañías “calquera apoio que estea en mans” do consorcio, como a inxección de liquidez a través da empresa de capital risco Viego Activo.
“Ofrézoche analizar todas as posibilidades que estean ao noso alcance para tratar de minorar os efectos do parón tras esta traxedia”, recalca Regades na súa carta.
