O sector de automoción de Galicia facturou en 2021 un 7,3 % máis que o ano precedente, ata os 11.200 millóns de euros, a pesar da crise de aprovisionamentos e dos efectos da pandemia de Covid. Así o trasladou nun comunicado o Cluster de Empresas de Automoción de Galicia (CEAGA), que este mércores se reunirá na súa asemblea anual para facer balance do pasado exercicio e abordar os seus retos de futuro.
A crise global dos microchips e o encarecemento de materias primas e enerxía non impediron que esta industria alcance en Galicia, un ano máis, cifras de marca. Así, o 2021 foi un ano de crecemento na facturación do sector, que veu subindo de forma ininterrompida desde o ano 2015 (no que a facturación se situou en 8.200 millóns de euros).
Na mesma liña, o comportamento das exportacións tamén foi positivo, e marcou o seu mellor dato histórico, alcanzando os 8.160 millóns de euros (un 12,4 % máis que en 2020). Esta cifra equivale ao 32,3% do total de exportacións de Galicia.
Con respecto aos compoñentes, tamén creceu a súa venda no exterior, un 1,8%, e chegou a 1.650 millóns de euros. Os principais destinos das exportacións foron Francia, Portugal, Reino Unido, Alemaña, Polonia, Arxentina, Marrocos, Eslovenia, Estados Unidos e Italia.
PERDA DE EMPREGO
A cara negativa do balance está no nivel de ocupación, xa que en 2021 a automoción galega perdeu 1.530 empregos. Así, aínda que o emprego neste sector é un 13,7% do emprego industrial de Galicia, hai un 6,1% de traballadores menos nesta industria, con respecto ao ano anterior.
Outra das magnitudes que retrocedeu foi o investimento, xa que en 2021 baixaron un 9,5%, ata os 124 millóns de euros, fronte aos 137 millóns de 2020 e moi lonxe dos 525 millóns de investimento do ano 2011.
Finalmente, tal e como recolle o balance de CEAGA, a industria de automoción galega segue liderando a produción de vehículos en España. Así, a planta de Stellantis en Vigo fabricou o 23,6% dos coches producidos no Estado.
