O Porto de Vigo adxudicou unha concesión á firma Landscape 68 España S.L. para que explote as instalacións do faro de Cabo Silleiro, en Baiona, e converterase nun hotel con 18-20 habitacións e un restaurante.
Así, na reunión do Consello de Administración do Porto celebrada este martes, informouse de que a empresa prevé investir 1,3 millóns de euros no acondicionamento desas instalacións e no seu equipamento, e terá esa concesión por un prazo de 35 anos, ampliables noutros 15. Ademais do propio faro, a concesión inclúe unha parcela adicional, e a superficie total que será utilizada pola empresa é duns 2.860 metros cadrados.
As obras que se realicen, así como os usos posteriores, non poderán afectar a sinalización náutica do faro, que seguirá cumprindo a súa función. Ademais do aloxamento, o proxecto prevé un restaurante, unha piscina e o uso dunha gran terraza.
Por outra banda, a empresa adxudicataria, que cifrou nunha ducia os empregos vinculados a ese hotel-restaurante, trasladou o seu interese en rehabilitar tamén zonas lindeiras, como o antigo faro, que está en ruínas e deixou de utilizarse en 1924.
Para que as reformas comecen, é necesario que Portos do Estado aprobe unha modificación e levante a prohibición do uso hoteleiro nese faro.
SUBMINISTRACIÓN DE ENERXÍA ELÉCTRICA
O presidente do Porto, Jesús Vázquez Almuíña, informou de que o organismo adxudicou o seu servizo de subministración eléctrica a Endesa Enerxía.
Trátase dun contrato adxudicado por 2,3 millóns de euros para un período de dous anos, e a un prezo de 0,1691 euros o quilowatt/hora (unha suba contida do 14 % con respecto ao prezo que paga agora o Porto pola súa enerxía eléctrica).
No contrato contémplase que a orixe da subministración debe ser “cento por cento renovable” e, segundo explicou Vázquez Almuíña, o 80 % da enerxía contratada será para consumo propio do Porto, mentres que o 20 % restante será para venda a terceiros.
