A presidenta do Administrador de Infraestruturas Ferroviarias (ADIF), Isabel Pardo de Vera, insistiu en que Galicia contará coa alta velocidade en servizo para outono deste mesmo ano, á vez que confirmou que a conexión con Portugal é un proxecto “prioritario” para o seu departamento.

Nunha entrevista concedida este domingo ao circuíto galego de Radio Nacional (RNE), recollida por Europa Press, Pardo de Vera confirmou a finalización das obras do AVE ata Ourense, polo que actualmente “xa está todo en probas”. “Temos unha infraestrutura complicadísima, carísima, pero é unha das infraestruturas pioneiras en evolución tecnolóxica en Europa e no mundo”, defendeu a titular do ADIF.

A presidenta do ADIF comprometeuse a dar “un impulso claro” aos trazados entre Ourense e Vigo, que forman parte do Corredor Mediterráneo. Consciente da “orografía complicadísima” destas vías centenarias, que ao longo deste inverno sufriron numerosas incidencias, afirmou que o tramo está “dentro da programación de investimentos” valorados nuns 500 millóns de euros.

Así mesmo, remarcou como “prioritario” o saída sur de Vigo cara a Portugal. É máis, Pardo de Vera insistiu na “clara aposta” tanto do Executivo luso como o español por impulsar esta infraestrutura “imprescindible, natural e de sentido común”. “Desde logo, a vontade do Goberno portugués e o español xa deu claros avances. Nós, como ADIF, iniciamos a tramitación do convenio co administrador de infraestruturas portugués”, avanzou, de face a un acordo que se asinará proximamente.

Please wait while you are redirected...or Click Here if you do not want to wait.